ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ /ᠮᠣᠩᠭᠣᠯ ᠠᠷᠠᠳ ᠤᠨ ᠦᠯᠢᠭᠡᠷ/
ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠴᠣᠯᠮᠣᠨ ᠴᠣᠬᠣᠷ ᠤᠨᠠᠭᠠ᠂ ᠳᠠᠯᠠᠨ ᠬᠣᠶᠠᠷ
ᠢᠵᠢᠯᠢ ᠰᠦᠷᠦᠭ᠂ ᠳᠠᠷᠬᠠᠨ ᠬᠤᠯᠠ ᠠᠵᠢᠷᠭᠠ ᠲᠠᠢ ᠪᠠᠨ ᠦᠵᠡᠰᠬᠦᠯᠡᠩᠲᠦ
ᠨᠣᠭᠣᠭᠠᠨ ᠬᠥᠨᠳᠡᠶᠢᠳᠡᠭᠡ ᠢᠳᠡᠭᠡᠰᠢᠯᠡᠨ ᠪᠡᠯᠴᠢᠳᠡᠭ ᠪᠠᠶᠢᠴᠠᠢ᠃ ᠭᠡᠲᠡᠯᠡ
ᠨᠢᠭᠡᠨ ᠵᠤᠨ ᠦᠵᠡᠰᠬᠦᠯᠡᠩᠲᠦ ᠨᠣᠭᠣᠭᠠᠨ ᠬᠥᠨᠳᠡᠢ᠂ ᠥᠷᠭᠡᠨ ᠲᠠᠯᠠ
ᠨᠤᠲᠤᠭ ᠲᠤ ᠨᠢ ᠭᠠᠨ ᠭᠠᠴᠢᠭ ᠪᠣᠯᠵᠤ ᠡᠪᠡᠰᠦ ᠨᠣᠭᠣᠭᠠ ᠤᠷᠭᠤᠭᠰᠠᠨ ᠦᠭᠡᠢ᠃
ᠲᠡᠭᠡᠬᠦ ᠪᠡᠷ ᠨᠢ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠳᠠᠯᠠᠨ ᠬᠣᠶᠠᠷ ᠢᠵᠢᠯᠢ
ᠰᠦᠷᠦᠭ᠂ ᠳᠠᠷᠬᠠᠨ ᠬᠤᠯᠠ ᠠᠵᠢᠷᠭᠠ ᠲᠠᠢ ᠪᠠᠨ ᠬᠠᠮᠲᠤ ᠨᠤᠲᠤᠭ ᠠᠴᠠ
ᠪᠠᠨ ᠭᠠᠷᠴᠤ ᠭᠤᠷᠪᠠᠨ ᠵᠢᠯ ᠦᠨ ᠭᠠᠵᠠᠷ ᠡᠪᠡᠰᠦᠨ ᠦ ᠰᠢᠮᠡ ᠶᠢ ᠬᠥᠭᠡᠭᠡᠨ
ᠠᠯᠤᠰ ᠤᠨ ᠠᠶᠠᠨ ᠳᠤ ᠭᠠᠷᠴᠠᠢ᠃
ᠲᠡᠭᠡᠵᠦ ᠶᠠᠪᠤᠭᠰᠠᠭᠠᠷ ᠲᠡᠳᠡ ᠡᠪᠡᠰᠦ ᠨᠣᠭᠣᠭᠠ ᠲᠡᠭᠰᠢᠷᠡᠭᠰᠡᠨ ᠦᠵᠡᠰᠬᠦᠯᠡᠩᠲᠦ
ᠨᠤᠲᠤᠭ ᠲᠤ ᠢᠷᠡᠵᠡᠭᠡᠪᠡ᠃ ᠲᠡᠳᠡ ᠲᠡᠨᠳᠡ ᠨᠤᠲᠤᠭᠯᠠᠵᠤ ᠤᠰᠤᠨ ᠤ
ᠰᠠᠶᠢᠨ ᠢᠶᠠᠷ ᠤᠮᠳᠠᠭᠠᠯᠠᠵᠤ᠂ ᠡᠪᠡᠰᠦᠨ ᠦ ᠰᠠᠶᠢᠨ ᠢ ᠢᠳᠡᠵᠦ᠂ ᠬᠤᠵᠢᠷ ᠤᠨ
ᠰᠠᠶᠢᠨ ᠢ ᠳᠣᠯᠢᠶᠠᠨ ᠬᠥᠭᠡᠭᠡᠴᠡᠯᠳᠦᠨ ᠲᠣᠭᠯᠠᠳᠠᠭ ᠪᠠᠶᠢᠯᠠ᠃
ᠭᠡᠲᠡᠯᠡ ᠲᠡᠷᠬᠡᠦ ᠭᠣᠣᠯ ᠤᠨ ᠬᠥᠪᠪᠥᠨ ᠳᠡᠭᠡᠷᠡ ᠭᠠᠯᠠᠭᠤᠨ ᠤ ᠳᠣᠯᠣᠭᠠᠨ ᠥᠨᠳᠡᠭᠡ
ᠪᠠᠶᠢᠭᠰᠠᠨ ᠢ ᠰᠦᠷᠦᠭ ᠦᠨ ᠬᠢᠨ ᠮᠡᠳᠡᠯ ᠦᠭᠡᠢ ᠬᠠᠭᠠ ᠭᠢᠰᠬᠢᠵᠦ ᠣᠷᠬᠢᠵᠠᠢ᠃ ᠲᠡᠷᠡ
ᠳᠠᠷᠤᠢ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠳᠠᠯᠠᠨ ᠬᠣᠶᠠᠷ ᠢᠵᠢᠯᠢ ᠰᠦᠷᠦᠭ᠂ ᠳᠠᠷᠬᠠᠨ
ᠬᠤᠯᠠ ᠠᠵᠢᠷᠭᠠᠨ ᠳᠤ ᠪᠠᠨ ᠡᠶᠢᠮᠦ ᠨᠢᠭᠡᠨ ᠰᠠᠨᠠᠭᠤᠯᠭᠠ ᠥᠭᠴᠡᠢ᠃
《ᠣᠳᠣᠬᠠᠨ ᠡᠨᠳᠡ ᠡᠴᠡ ᠶᠠᠪᠤᠵᠠᠭᠠᠶᠠ᠃ ᠪᠢᠳᠡ ᠬᠦᠮᠦᠨ ᠦ ᠨᠤᠲᠤᠭ ᠲᠤ ᠳᠤᠷᠠ
ᠪᠠᠷ ᠢᠶᠠᠨ ᠢᠷᠡᠵᠦ ᠳᠣᠯᠣᠭᠠᠨ ᠴᠠᠭᠠᠨ ᠥᠨᠳᠡᠭᠡ ᠶᠢ ᠨᠢ ᠭᠢᠰᠢᠭᠯᠡᠨ ᠬᠥᠨᠦᠭᠡᠯᠡ᠃
ᠲᠡᠶᠢᠮᠦ ᠡᠴᠡ ᠡᠨᠡ ᠨᠤᠲᠤᠭᠢᠬᠠᠨ ᠪᠢᠳᠡᠨ ᠢ ᠣᠳᠣ ᠳᠠᠶᠢᠰᠤᠨ ᠢᠶᠠᠨ ᠭᠡᠵᠦ ᠦᠵᠡᠬᠦ
ᠪᠣᠯᠤᠨᠠ᠃ ᠲᠤᠩ ᠤᠳᠤᠬᠤ ᠦᠭᠡᠢ ᠥᠷᠯᠥᠭᠡᠨ ᠦ ᠮᠠᠨᠳᠤᠬᠤ ᠨᠠᠷᠠᠨ ᠢᠶᠠᠷ ᠰᠢᠪᠠᠭᠤᠨ
ᠰᠦᠷᠦᠭ ᠢᠷᠡᠭᠡᠳ ᠪᠢᠳᠡᠨ ᠢ ᠳᠣᠪᠲᠣᠯᠤᠨ ᠬᠥᠨᠦᠭᠡᠬᠦ ᠪᠣᠯᠤᠨᠠ》 ᠭᠡᠪᠡ᠃
ᠭᠡᠪᠡᠴᠦ ᠢᠵᠢᠯᠢ ᠰᠦᠷᠦᠭ ᠨᠢ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦᠨ ᠦ ᠦᠭᠡᠨ ᠳᠦ
ᠣᠷᠣᠯ ᠦᠭᠡᠢ ᠪᠢᠴᠢᠬᠠᠨ ᠰᠢᠪᠠᠭᠤᠳ ᠢ ᠪᠠᠰᠤᠮᠵᠢᠯᠠᠨ ᠳᠣᠭᠣᠭᠢᠯᠠᠭᠰᠠᠭᠠᠷ ᠵᠤᠭᠠ
ᠴᠡᠩᠭᠡᠯ ᠢᠶᠡᠨ ᠦᠷᠭᠦᠯᠵᠢᠯᠡᠭᠦᠯᠵᠡᠢ᠃
ᠭᠡᠲᠡᠯᠡ ᠮᠠᠷᠭᠠᠰᠢ ᠥᠷᠯᠥᠭᠡᠨ ᠦ ᠤᠷᠭᠤᠬᠤ ᠶᠢᠨ ᠤᠯᠠᠭᠠᠨ ᠨᠠᠷᠠᠨ ᠢᠶᠠᠷ ᠦᠨᠡᠬᠡᠷ ᠰᠢᠪᠠᠭᠤᠨ
ᠰᠦᠷᠦᠭ ᠢᠷᠡᠵᠦ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦᠨ ᠦ ᠳᠠᠯᠠᠨ ᠬᠣᠶᠠᠷ ᠢᠵᠢᠯᠢ᠂
ᠳᠠᠷᠬᠠᠨ ᠬᠤᠯᠠ ᠠᠵᠢᠷᠭᠠ ᠶᠢ ᠨᠢ ᠲᠣᠩᠰᠢᠵᠤ ᠠᠯᠠᠭᠠᠳ ᠳᠠᠭᠤᠰᠬᠠᠵᠠᠢ᠃ ᠭᠠᠭᠴᠠ
ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠯᠠ ᠴᠣᠯᠮᠣᠨ ᠴᠣᠬᠣᠷ ᠤᠨᠠᠭᠠ ᠲᠠᠢ ᠪᠠᠨ ᠠᠮᠢ ᠭᠠᠷᠤᠨ
ᠵᠢᠭᠤᠲᠠᠵᠠᠢ᠃
ᠭᠡᠪᠡᠴᠦ ᠬᠣᠷᠣᠰᠴᠤ ᠪᠤᠬᠢᠨᠢᠲᠤᠭᠰᠠᠨ ᠰᠢᠪᠠᠭᠤᠨ ᠰᠦᠷᠦᠭ ᠡᠬᠡ ᠬᠡᠦ ᠬᠣᠶᠠᠷ ᠢ ᠬᠥᠨᠦᠭᠡᠬᠦ
ᠭᠡᠳ ᠪᠦᠰᠡᠯᠡᠨ ᠳᠣᠪᠲᠣᠯᠬᠤ ᠪᠠᠨ ᠵᠣᠭᠰᠣᠭᠰᠠᠨ ᠦᠭᠡᠢ᠃
ᠢᠩᠭᠢᠭᠰᠡᠭᠡᠷ ᠲᠡᠳᠡᠨ ᠦ ᠪᠠᠶᠢᠯᠳᠤᠬᠤ ᠰᠤᠮᠤ ᠨᠢ ᠴᠥᠭᠡᠷᠡᠴᠢ ᠵᠥᠪᠬᠡᠨ ᠨᠢᠭᠡ ᠲᠠᠯᠠ
ᠠᠴᠠ ᠨᠢ ᠬᠠᠷᠪᠤᠨ ᠳᠣᠪᠲᠣᠯᠬᠤ ᠪᠣᠯᠪᠠ᠃ ᠬᠣᠶᠢᠳ ᠲᠠᠯᠠ ᠠᠴᠠ ᠨᠢ ᠳᠣᠪᠲᠣᠯᠬᠤ
ᠳᠤ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠤᠨᠠᠭᠠ ᠪᠠᠨ ᠤᠷᠳᠤ ᠲᠠᠯᠠ ᠳᠤ ᠪᠠᠨ ᠠᠪᠴᠤ
ᠬᠠᠮᠠᠭᠠᠯᠠᠪᠠ᠃ ᠡᠮᠦᠨᠡ ᠲᠠᠯᠠ ᠠᠴᠠ ᠨᠢ ᠳᠣᠪᠲᠣᠯᠬᠤ ᠳᠤ ᠤᠨᠠᠭᠠ ᠪᠠᠨ ᠬᠣᠶᠢᠳ
ᠲᠠᠯᠠ ᠳᠤ ᠪᠠᠨ ᠠᠪᠴᠤ ᠬᠠᠮᠠᠭᠠᠯᠠᠵᠠᠢ᠃
ᠪᠤᠬᠢᠨᠢᠲᠤᠵᠤ ᠠᠭᠤᠷᠯᠠᠭᠰᠠᠨ ᠰᠢᠪᠠᠭᠤᠨ ᠰᠦᠷᠦᠭ ᠳ᠋ᠠᠬᠢᠨ ᠭᠠᠵᠠᠷ ᠤᠨ ᠳ᠋ᠣᠣ ᠳᠤ ᠲᠠᠯᠠ ᠪᠠᠷ
ᠳᠣᠪᠲᠣᠯᠤᠨ ᠬᠠᠷᠪᠤᠬᠤ ᠳᠤ ᠭᠡᠭᠦᠦ ᠤᠨᠠᠭᠠ ᠪᠠᠨ ᠭᠠᠵᠠᠷ ᠤᠨ ᠳᠡᠭᠡᠳᠦ ᠲᠠᠯᠠ ᠳᠤ ᠭᠠᠷᠭᠠᠨ
ᠬᠠᠮᠠᠭᠠᠯᠠᠪᠠ᠃ ᠴᠢᠩᠬᠠ ᠳᠡᠭᠡᠷᠡ ᠡᠴᠡ ᠨᠢ ᠳᠠᠭᠠᠷᠢᠨ ᠳᠣᠪᠲᠣᠯᠬᠤ ᠳᠤ ᠤᠨᠠᠭᠠ ᠪᠠᠨ
ᠳᠣᠣᠷᠠ ᠪᠠᠨ ᠣᠷᠣᠭᠤᠯᠤᠨ ᠬᠠᠮᠠᠭᠠᠯᠠᠵᠠᠢ᠃
ᠢᠩᠭᠢᠭᠰᠡᠭᠡᠷ ᠰᠢᠪᠠᠭᠤᠨ ᠰᠦᠷᠦᠭ ᠴᠤ ᠵᠠᠯᠬᠠᠵᠤ ᠶᠠᠳᠠᠷᠠᠭᠠᠳ᠂ ᠰᠤᠮᠤ ᠵᠡᠪᠰᠡᠭ
ᠨᠢ ᠴᠤ ᠡᠯᠡᠭᠳᠡᠵᠦ ᠳᠠᠭᠤᠰᠤᠭᠠᠳ᠂ ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠶᠢ ᠤᠨᠠᠭᠠ
ᠲᠠᠢ ᠨᠢ ᠬᠠᠮᠲᠤ ᠣᠷᠬᠢᠭᠠᠳ ᠪᠤᠴᠠᠵᠠᠢ᠃
ᠴᠣᠯᠮᠣᠨ ᠴᠣᠭᠣᠬᠣᠷ ᠤᠨᠠᠭᠠ ᠪᠠᠨ ᠡᠰᠡᠨ ᠮᠡᠨᠳᠦ ᠠᠪᠴᠤ ᠦᠯᠡᠳᠡᠭᠰᠡᠨ ᠴᠤᠤᠲᠤ ᠶᠢᠨ
ᠴᠠᠭᠠᠭᠴᠢ ᠭᠡᠭᠦᠦ ᠭᠤᠷᠪᠠᠨ ᠵᠢᠯ ᠦᠨ ᠴᠠᠭᠠᠨᠠ ᠪᠠᠶᠢᠭᠠ ᠨᠤᠲᠤᠭ ᠤᠨ ᠵᠦᠭ
ᠪᠤᠴᠠᠬᠤ ᠪᠠᠷ ᠰᠠᠷᠠ ᠶᠢᠨ ᠭᠠᠵᠠᠷ ᠢ ᠡᠳᠦᠷ ᠢᠶᠡᠷ ᠡᠳᠦᠷ ᠦᠨ ᠭᠠᠵᠠᠷ ᠢ ᠰᠠᠷᠠ ᠪᠠᠷ
ᠲᠣᠪᠴᠢᠯᠠᠨ ᠶᠠᠪᠤᠪᠠ᠃ ᠭᠡᠲᠡᠯᠡ ᠨᠢᠭᠡᠨ ᠡᠳᠦᠷ ᠴᠣᠯᠮᠣᠨ ᠴᠣᠬᠣᠷ ᠤᠨᠠᠭᠠ
ᠡᠵᠢ ᠡᠴᠡ ᠪᠡᠨ᠄
– ᠡᠵᠢ ᠪᠡᠨ᠂ ᠡᠵᠢ ᠪᠡᠨ ᠲᠠᠨ ᠤ ᠪᠡᠶᠡ ᠪᠡᠷ ᠨᠢᠭᠡ ᠰᠠᠷᠠᠶᠢᠵᠤ ᠰᠡᠷᠡᠶᠢᠭᠰᠡᠨ
ᠡᠨᠡ ᠶᠡᠬᠡ ᠵᠦᠢᠯ ᠴᠢᠨᠢ ᠤᠤ ᠪᠤᠢ? ᠭᠡᠵᠦ ᠠᠰᠠᠭᠤᠵᠤ ᠭᠡᠨᠡ᠃ ᠴᠤᠤᠲᠤ ᠶᠢᠨ
ᠴᠠᠭᠠᠭᠴᠢ ᠭᠡᠭᠦᠦ ᠬᠠᠷᠢᠭᠤ ᠳᠤ ᠨᠢ᠄
– ᠬᠠᠷᠭᠠᠨᠠ ᠪᠤᠲᠠ ᠲᠠᠢ ᠳᠠᠪᠠᠭᠠ ᠶᠢ ᠳᠠᠪᠠᠬᠤ ᠳᠤ ᠰᠢᠪᠡᠭᠡ ᠦᠵᠦᠭᠦᠷ ᠲᠡᠢ
ᠡᠪᠡᠰᠦ ᠯᠠ ᠨᠠᠭᠠᠯᠳᠤᠭᠠ ᠪᠢᠵᠡ ᠳ᠋ᠡ ᠭᠡᠪᠡ᠃ ᠭᠡᠲᠡᠯᠡ ᠤᠨᠠᠭᠠ ᠳᠠᠬᠢᠭᠠᠳ ᠯᠠ᠄
– ᠡᠵᠢ ᠪᠡᠨ᠂ ᠡᠵᠢ ᠪᠡᠨ᠃ ᠲᠠᠨ ᠤ ᠪᠡᠶᠡᠰ ᠣᠷᠭᠢᠯᠠᠵᠤ ᠤᠷᠤᠰᠤᠭᠠᠳ ᠪᠠᠶᠢᠭᠠ
ᠤᠯᠠᠭᠠᠨ ᠤᠯᠠᠭᠠᠨ ᠶᠤᠮ ᠤᠤ ᠪᠤᠢ? ᠭᠡᠵᠦ ᠠᠰᠠᠭᠤᠪᠠ᠃ ᠬᠠᠷᠢᠭᠤ ᠳᠤ ᠨᠢ
ᠴᠤᠤᠲᠤ ᠶᠢᠨ ᠴᠠᠭᠠᠭᠴᠢ ᠭᠡᠭᠦᠦ᠄
– ᠵᠣᠰᠣᠲᠤ ᠶᠢᠨ ᠤᠯᠠᠭᠠᠨ ᠳᠠᠪᠠᠭᠠ ᠪᠠᠷ ᠳᠠᠪᠠᠬᠤ ᠳᠤ ᠵᠣᠰᠣᠨ ᠳᠤ
ᠪᠤᠳᠤᠭᠳᠠᠭᠰᠠᠨ ᠤᠯᠠᠭᠠᠨ ᠰᠢᠪᠠᠷ ᠨᠠᠭᠠᠯᠳᠤᠭᠠ ᠪᠢᠵᠡ ᠡ ᠭᠡᠵᠡᠢ᠃ ᠬᠡᠰᠡᠭ
ᠶᠠᠪᠤᠵᠤ ᠪᠠᠶᠢᠭᠠ ᠤᠨᠠᠭᠠ ᠳᠠᠬᠢᠭᠠᠳ ᠯᠠ᠄
ᠳᠠᠷᠠᠭᠠᠬᠢ